Dazhiikigaadeg Maanendamowin (Anishinaabemowin)

Gaa-gii-ozhitood owe: Raven Spiratos

Gii-ziigwang 2020, COVID-19 gidagoshinoomagan Tkaronto/Toronto. Niibiwa awiyag gii-zegiziwag, niibiwa awiyag gii-aanjitoomin gaa-izhi-bimaadiziying gaye gaa-izhi-wiijiiwangwaa godak awiyag. Aanind gii-zaagijiwebishkiganiwiwag ji-dazhiikamowaad aakoziiwin. Aanind gaye o-gii-wani'aawaa odinawemaaganiwaa'. Niibiwa gii-zhagadendamoog gaye gii-maanendamoog.

Gaawiin eta nibowin gaa-gii-onji-maanendamang gi-gii-waabanadaamin.Gaawin bezhigwayak ji-izhi-maanendamang. Daabishko nibi, mii enendaagwak maanendamowin. Gi-wii-gozaabiimin, gaawiin gigikendaziimin ezhinaagwak anaamiindim. Ngoding gaye ozaami-gichi-ayinaashkaa nibiing wenji-zanagiseying. Ngoding gaye gaawiin gigashkitoosiimin ji-babaamaadageyin gi-michi-agwanjinomin.

Giiyaabi dash gi-gii-gashkitoomin ji-dazhindamang wenizhishing. Gi-gii-gashkitoomin ji-minochigeying aanawi gii-maanzhichigemagak iwe gichi-aakoziwin ewaawiiji'idiying iwe apii.

Amii aaniish ezhiseg gii-gichi-maanzhiseying, zhaagooch igo gi-gashkitoomin ji-mikamang wenizhishing. Tkaronto "Ebadakizowaad Mitigoog" iinzan ikidoomagan iwe Tkaronto Kanien'keha:ka. Biminizha'an dash iwe nibi. Nawach da-anwaatin wedi niigaan.

Owe waabanda'iwewining da-gaagiigidowag awiyag, da-mazinichigewag gaye gete gegoonan da-ayaawan. Mii imaa ge-izhi-noondawangwaa dazhiikewining gaa-daawaad gaye gaa-mazinichigewaaad gaye gaa-anokiiwaad, gaye gaa-anokaadamowaad bimaadiziwin ji-wiindamaagewaad enendamowaad iwe aakoziwin. Mii ono odibaajimowiniwaan giinawaa gidibaajimowiniwaa gaye giinawind gidibaajimowinnaanan.

“Iwe gichi-aakoziwin gi-gii-onji-gikendaamin gakina e-bezhigoying, ji-wiidookodaadiying.” – Ogimaakwe Stacey Laforme, Mississaugas of the Credit First Nation

“Iwe gichi-aakoziwin niibiwa awiyag gii-ishkwaa-bimaadiziwag, gi-gii-wiijiiwaanaanig gidinawemaaganinaanag gaye gi-gii-dibendaagozimin” – Dr. Judith Seary

“Maanendamowin, maanzhendamowin, gaye bimaadiziwin gaye nibowin, COVID-19 - gi-gii-gikino'amawinaam niibiwa.” – Jennifer Connolly, Toronto Home Child Care